LALPA'N MIN NGAIHTUAH ṬHIN

 LALPAN MIN NGAIHTUAH THIN

(Sam 40:12-17)

Sam 40-na, chang 12-17 hi Sam 70-na nen khan a thu in ang thlap lo mahse, a danglam vaklo. Puih dilna tiin a thupui hi dah a ni a, Lehlin tharah hi chuan, Tanpui dilna tih a ni. A ziaktu hi dinhmun chhe taka ding, harsatna leh hrehawmna nasa tak tuartu a ni tih kan hre thei. 

Thil thalo tam takin a hual a, a tihsual, a bawhchhiatna pawh a nasa hle. A samzai ai pawha tam a nih thu a sawi. Amah tihhlum tumtu leh a chhiatna tur zawng ngar ngartu hmelma a nei a, mihring lam atang chuan a beidawn hmel hle a ni. Amaherawhchu, he Sam ziaktu hian Pathianin a ngaihtuah thin tih hi a hre tlat. Eng dinhmunah pawh ding sela, amah kalsan lova ngaihtuah rengtu, Pathian a awm tih hi a hrechiang em em. Ringtute kan vanneih em emna chu, dinhmun harsa tak ah pawh ding mah ila, engtiklai pawha min ngaihtuahtu Lalpa kan nei hi a ni.

He leiah hian hlimna leh lawmna, thil tha leh a nuam lam ringawt hi kan chang reng thei lova, harsatna te pawh hi kan tawh ve tur reng a ni. Kan mihring puite, kan chhungkhat leh thian thate thleng pawhin a min kalsan emaw, mitena min hmuhsit viau hun pawh a awm mai thei. Chutiang hunah pawh chuan engkim titheia, engkim hretu kan Pathian hian min hawisanin, min kal san ve ngai hauh lo. Tihsual nei miahlo emaw, misual tak pawh kan ni mai thei. Eng mi pawh nimah i la, Pathian hian min ngaihtuah reng thin. Hei hi mi tam takin hre loin, an nunna lak phah emaw, an thlarau tana thil pawi tak tih phahna atan an hmang thin a ni.

Ni, kan nunah harsatna leh buaina, manganna a lo thlen tak tak hi chuan bei hi a dawng em em a, Pathian kan dem rum rum a, khawiahnge maw a awm le tih mai a awl thin. Kei ngei pawh hi ka bang biklo. KTP ah kan inhmang chho, hruaitu kan han ni chho a, ka phur a, ka tui em em bawk. Mahse, 2014 kum tawp lamah ka che sual a, ka kut kha tipalh a ni. Ka unaute an indang tawh a, nu leh pa chawmtu kha ka ni ve mai a. Ka rilru a hah a, ka rilru kha a hah ve a ni. Tlangval kan la ni zui bawk nen, ngaihtuahna a thui thin khawp mai. Chutah, 2015 kumtir lam atangin ka pa kha a damlo tan a, Private ah a in entir reng phawt a, a dam theihloh avangin damdawiin hrang hrang kan pan leh a, eng a ang tak tak thei chuang si lova, tichuan kum 2016, March thlaah a boral ta a ni.

A damloh lai vel khan thi teuh deuh deuhin a awm thin a, kut chhe chung chung khan 2015 khan KTP Secretary ah min thlan avangin KTP chet velna hrang hrangah kan han tel ve lawp lawp thina, mahse, thlamuang taka awm a har thin. A zual deuh avanga min phone haw tumte a awm fo. Khatih lai khan Pathian hi ka dem lek lek thin a ni. A han boral chiah phei kha chu ka bei hi a dawng em em a, kei, engmah ka ni bawk silo nen, Pathian hi ka dem a, ka beidawng em em. Mahse, ka thinlungah hian rinna ka nei a, ka au a, ani chuan min kalsan ngailo tih hi ka hria a, tun hi ka thleng a, Pathianin min ngaihtuah zia hi ka hre chiang telh telh mai.

Zu leh ruihhlo ka tih thin avangin ka mangang em? Nulat tlangvalna kawnga ka lo chet sual avang emaw, ngaihzawng then avangin ka na thin em? Kan chhungkaw dinhmun harsat avang leh inchhung khura engemaw buaina kan tawh avangin hrehawm takin ka awm em? Tuten emaw min sawisel a, min hmuhsit emaw, min nuihsawh avangin mi chungah rinna nghat theilo khawpin ka na em? Harsatna leh buaina avangin beidawng tak leh mahni intihhlum hial duhna khawp rilru puin kan awm em? Pathian hnenah thlen ang u. Amah pan ang u. Lalpan min ngaihtuah thin.

A nihna takah chuan keimahni tum dan leh kan duh anga Pathian hi chettir kan tum avang hian Pathian hi kan dem phah a, min ngaihsaklo niin kan ngai thin mai zawk a  ni. Tah Hla 3:24-26 ah chuan, 'LALPA chu ka chanpual a ni, ka nunnain a ti a, Chuvangin amah chu ka beisei ang. LALPA chu amah nghaktute tan a tha a, amah zawngtu tan chuan. LALPA chhandamna beisei a nghah veng veng chu a tha a ni' tih kan hmu. Kan tum angin kan nunah thil thleng nghal mai loin, harsatna leh buaina lak ata min chhanchhuak nghal lo mah se la, engtiklai pawha min ngaihtuahtu, Lalpa chu nghak fan fan ang u. Thenkhat ten muanga an ruat angin Lalpa chu a muang lo e.

Kan rin Pathian hian mahni kan inhriatchian aia nasain min hrechiang zawk. Lungawi tak leh lawm taka min awm tir reng hi a thiltum a ni lem lova, amah nena kan inpawl theih hi a duh ber zawk a ni. Chutiang chuan mahni kan inhriat loh thleng thlenga min hrechiangtu a nih angin, kawng engkimah kan tana tha turin ro a rel mai thin zawk a ni. Sam 139-na kha han chhiar teh u. Pathianin min hriat chian zia chu a chiang a sin! 'A ruka siama ka awm a, Lei hmun hnuaihnung bera mawi taka siama ka awm lai khan Ka ruhrel chu i lakah thupin a awm lo. Ka riruang la famkim lo chu i mitin a hmu a, I lehkhabuah chuan ka pengte zawng zawng hi ziak vek a ni a, A ni tela siamin a awm zel a, A pakhat mah la awm hmain' a ti. Heti taka min hrechiangtu hian, min ngaihtuah loh vang ni lovin, kan thatna tur zawkin ro min rel sak zel thin zawk a lo ni.

Pathian hian min ngaihtuah satliah a nilo, min enkawl a, min veng reng thin. Mihringte mai nilo, thil engkim hi a veng thin a ni. John Calvina chuan, "Van atangin Pathianin  khawvel leh a chhunga thilsiamte hi a ralkhat thlir mai lo, a kut leh ke thawh hial khawpin enkawl leh venhim hna a thawk zawk a ni. Ni hi daltu nei hauh lova a lo chhuaka a tla leh thin te, a lum leh en dan kumkhuaa a pangngai reng theihna chhan te, vana arsite anmahni kawng theuh a in su buai hauh lova an chet vel theihna chhan te, sik leh sa a hun pangngai a lo in her chhuak thin te, leiin buh leh bal, mihringte chawmna atana a thar chhuah theihna chhan te hi eng dang vang ni loin, Pathianin khawvel leh a chhunga thilsiamte a enkawl a a vawn that vang a ni," a ti. Chutiang chuan Lalpa'n a thilsiamte hi min vengin min enkawl a, min ngaihtuah em em.

Kan sawi tak atang hian, Lalpan min ngaihtuah tih hian, min ngaihvenin, kan chanchin, kan awmdan hi a thlir liam mai mai lo a ni tih kan hre thei ang. Khawiahnge kan awm a, eng nge kan tih thin? Engtianginnge kan nun tih hriat  satliah ringawt hi a tum reng renglo. Chung zawng zawngah chuan eng nge kan mamawh? Engtia awm tur nge? Eng nge kan tana tha ber tur tih a ngaihtuah a, chutiang a nih theihna turin min pui thin a ni. Chu tak chu a ni mi zawng zawng tan Pathian a hlutna.

Amah ringtu emaw, a rawngbawltu tha takte chauh hi Pathianin a ngaihtuah ngawt lo. Mi zawng zawng hi Lalpa hian a ngaihtuah vek. Chumi hmufiahtu leh hrethiamtu leh hmu thiamlotu erawh chu kan awm mai chauh a ni. Chuvangin, eng nga ti bik nge? Engvang nge? ti ti lo hian, Lalpa, eng nge i tum le? Eng hi nge i duhdan tih hi kan nunah in zawtin, engtik lai pawha min ngaihtuahtu Lalpa hi dawhthei takin nghak fan fan teh ang u.

A nihna tak ah chuan mihring hian Pathian ngaihsakna, a ngaihtuah reng nih hi kan phu em ni? John Calvina chuan, suala mihring tluk hnu thlarau lam dinhmun hi 'Thatna reng reng neilo, chhe hlawm tawp' tiin a sawi a. Isaia chuan, 64:6 ah khan 'Kan felna zawng zawng pawh silhfen bawlhhlawh ang kan ni' tiin a sawi thung. Chuti chung chunga min ngaihtuah a, min la enkawl zel hi 'Pathian khawngaihna' min hmangaih vang chauh a ni. Kan phu vang ni miah loin, Hmangaihna avang chauhin Lalpa'n min ngaihtuah thin.

Min ven leh min enkawla, min ngaihsak zui hi Pathian hian a ba reng reng lo. A nihna takah chuan, mihringte lakah hian lungawilo a, min hnuchhawn turin a thiamawm hliah hliah. Mahni duhthu ngeiin, kan hawisan a, a thupek zawm loin, a thu kan awih duhlo a, a lak ata kan inti hrang a ni. Chuti chung chung pawh chuan, a thilsiam mihringte a ngaihtuah avangin an lakah, dinhmun tlawm berah a ding a, thi khawp hialin a tuar a ni. Hei bak baka inngaihtuah hi a awm thei awm lo e. Heng zawng zawng hi ngaihtuah chian chuan, Pathian hi demna tur a awmlo chiang a sin!

A tawpna atan, he leiah hian dinhmun ngai rengin kan ding dawnlo tih kan hre vek awm e. Hlim leh lawm taka awm chang nei mah i la, hrehawmna leh manganna avanga mahni intihhlum hial duhkhawp rilru pu pawhin kan la awm ang. Zu leh ruihhlo avanga mahni inrintawkna pawh neilo, chhungkua leh khawtlang pawhin a rin ngam loh dinhmun pawh kan ding mai thei, retheihna leh natna avanga buaina nasa tak pawh kan la tawk ang. Min puitu kan hmu lova, Pathian lah a reh vung vung si. Chutiang hunah pawh chuan hei hi hre reng ang u. tumah thleibik leh duhsak bik neilo, engkim hriaa engkim titheitu, Khawngaihna avanga min chhandamtu, Pathian lam hi hawiin, beisei tlat ang u. Ni li pawn tlai se, a hunah a lo thleng em em ang. Lalpa'n min ngaihtuah thin.