KA TLANTU CHU A NUNG

 KA TLANTU CHU A NUNG

(Joba 19 : 20 - 29)

Vawiina kan thupui tur hi 'Ka tlantu chu a nung' tih a ni dawn a ni. Bible chang lar tak a ni a, he thu beh chhan hian fakna hla pawh siam a ni a, a lar pawh a lar viau nghe nghe hi.

Kumin kumtir lam kha niin ka hriaa, KHB No. 177 -na, Ka tlantu chu a nung tih ka hria' tih kha Biak Inah hian kan sa a, chumi tum chuan he thu hi ka rilruah a lian hle mai a, a hnu thlengin ka ngaihtuah zui char chara, Sermon ah ka buatsaih zui ta a ni. 

He Bible thu hi uluk taka chhiar a, ngun taka chhût hian a ropui zia leh thûk zia hi a chiangin, a fiah telh telh maiin ka hria. Harsatna leh buaina nasa tak kara rinna nghet tak tawngkam niin, beidawnna thûk tak atanga beiseina au aw a ni. Joba'n harsatna leh buaina nasa tak a tawh lai a a innghahna a ni tih kan hre thei. A beisei innghahna pawimawh tak a ni.

Joba chanchin chu kan hre vek awm e. Mi famkim, mi ngil, Pathian tih mi, thil thalo laka in sum thei ti a Pathian meuh pawhin a sawi a ni. Kawng hrang hrangin Pathian malsawmna a dawng a, sum leh pai ah te, fanau ah te pawh Pathian malsawmna a dawng nasa hle. Khawchhak fate zinga ropui ber tiin Bible pawhin a sawi hial a nih kha. Chutiang mi chu nimahsela, thawklehkhatah, chhiatna nasa tak a chungah a lo thleng a, a fate leh a thil neih zawng zawng a chân a, amah ngei pawh panchhia veiin, hrehawm tak a tuar a nih kha. 

Chumi chinah chuan a nun chu hrehawmna, lungngaihna hlir a ni chho zui mai. A unaute leh a laichin ten an hlatsan a, ama chhiahhlawhte ngei pawhin engahmah an ngailo. A thiante ngeiin an hmusit a, an diriam a ni. Joba chu a thiante pathum - Elifaza, Bildada leh Zofara ten an rawn kan a, chung mite chu amah thlamuan a, hnem tur leh a chunga thil thlengte hriatthiampui turin Joba'n a beisei a mahse, chutiang chu a ni lo. Joba tuarna chu a sual vanga Pathian hremna ah an puh sak hlauh.

A hun lai Juda te ngaihdan thlir chuan thil awm tak pawh a ni ve tho mai. Juda te chuan, natna leh harsatna an tawh chuan an sual vanga Pathian hrem naah an ngai zel thin. Heti zawnga ngaihtuah chuan Joba thiante pawh hi an demawm lutuk bik lo. Tun thleng pawhin hetiang ngaihdan la nei hi kan awm mai thei a ni. Kan tihsual avang hian Pathian chuan min hrem thin ngei mai mahse, natna leh harsatna kan tawh zawng zawng hi kan tihsual avanga Pathian min hremna a ni vek kherlo tih erawh kan hriat tel a tha. 

Joba hian a chunga thil thleng hi Pathian tihah chuan a pawm thlap mahse, a sual avanga tuar ni chuan a in pawm theilo. Pathian hremna tawk tur khawp a thil sual a tih a hre lo a ni. Chutihlai in a thiante lah chuan a sual vangah an rawn puh sak hmak mai si. Chuvang chuan Joba a lungawi lova, Pathian hial a dem a, beidawng tawpkhawkin a awm a, chu a beidawnna ruam atang chuan he thu hi a rawn au chhuah pui ta a ni. He thu hi Joba thusawi ah chuan a ropui berte zing a mi ni a ngaih a ni. Norman C. Habel chuan a lehkhabu ah, 'Joba rinna thupuan ropui' tiin a sawi nghe nghe.

Tichuan, Joba nun atangin kan thupui hi heti hian sawi dawn teh ang.

1. Joba tuarna belhchhahtu chu a thiante an ni : He mi hmalam leh a bung tawp hi kan ngaihtuah chian chuan, Joba hi a thiante chungah a lungni lo hle tih kan hre thei. A hun lai Juda ho ngaihdan kan sawi takte ngaihtuahin Joba thiante hian dawt an sawiin, thil diklo an ti pawhin a lang chiah lo mahse, rin dan avang ringawta Joba an puh tlat leh amah hriatthiamna an nei miah lo kha Joba hian a ngaithiam lo a ni.

Mizote hi huho nun nuam ti mi kan ni. Thian pawh kan ngaina mahse, harsatna tawk mek kan thiante leh kan bula mite tan hian eng dinhmunah nge kan din ve ang le? Anmahni hnemtu nge kan nih ang ti hrehawm zualtu? Rin thu leh ngaihdan kan sawi kual vak vak te hian tuartu lamah harsat zualna a thlen thei thin tihte hi ngaihtuah thin ang u. An damna kan thlen theilo a nih pawhin, nat belh tirtu nilo hram ang u. Kan lo huat ruk ngawih ngawih an ni emaw, kan ngei zawng tak pawh ni se, Hmangaih tawp lova hmangaihtu Pathian a awm tho. Midangte dinhmun hre miah si lova, na deuh a tawngkhum emaw, mahni duh zawng zawnga tih hi ching lo ang u. Helam chu duhtawk i la.

2. Joban amah tlantu tur a hrechiang : Joba khan 'Ka tlantu chu a nung tih ka hria' a ti. Nung tih hi Thuthlung hlui bu dang kan en chuan Pathian chungchang sawina atan an hmang thin. Pathian nung tihte in. Chu chuan awmze thuk tak a nei. Thil nung chuan hlutna, pawimawhna a nei a, tangkaina a nei. Joba khan amah tlantu tur nunga chu a hre chiang hle. A chunga thil thleng zawng zawng pawh kha chu tlantu nung Pathian rorel a ni tih a hre chiang a ni. Mahse, a chunga a rorel dan erawh pawm thiam har a ti mai a ni.

Kan chunga harsatna leh buaina lo thleng thinte hi pawmthiam har kan ti fo. Engati bik nge, engvangin nge ka tawh bik tiin Pathian hial kan dem a ni mai thei e. Chu kan harsatna sukiang theitu chu Pathian chauh chu a ni tho tho. Chuvangin, Pathian lakah vui thin mah i la, amah ah tlu lut tho teh ang u. Kan buaina chu min chinfel sak tho tho ang. Joba vek hian 'Tuarna hi vaivuta ta lo chhuak a ni lova, buaina pawh hi lei atanga lo to chhuak a ni hek lo' tiin chhan neilo in Pathianin thil a thlen tir lo tih a lo sawi daih tawh. Kan nuna harsatna thleng hi engatannge Pathianin a tih tih hi hriat tum zawk ang u.

Pathian hi eng ang chiahin nge kan hriat ve hlawm ang le? Tlantu nung angin kan hre ve hlawm em? Ringtu inti tam takte nun dan en hi chuan, Pathian hi kan hre chiang lo em ni aw tih mai a awl thin. Pathian chu engkimtithei, chungnungber, engkim chunga roreltu kan tih lai hian, mi tam tak nun danah hi chuan Pathian hi kan chhiahhlawh chei riau in ka hre thin. Engkimtithei a nihna hi kan hrethiam viau a, kan duhzawng pawh kan dil nasa a nih hi mahse, engkim chunga roreltu leh thuneitu a nihna te hi pawm harsa kan tih hmel thin. Engkim chunga roreltu leh thuneitu a ni a, eng dinhmunah pawh min din tir thei tih hi theihnghilh lo ang u. Chutiang chuan kan chunga thil thleng zawng zawngah hian Pathian lo chu innghahna tlak, dinhmun chhe ber atang pawha min tlan thei beisei tur kan nei lo.

A pathumna leh a tawpna atan chuan

3. Joba'n beisei a nei : Joba chanchin kan hre vek a, harsatna leh hrehawm nasa tak tuarin, lungngai mangangin a awm. Chuvang chuan a nun a tuihal a, beisei a nei. Chu chu amah hrethiamtu, chhantu, a dikna din pui tu tur a ni. Thlamuanna, hahchawlhna tih pawhin a sawi theih ang. Chutihlaiin a thenrualte leh khawtlangin an en san a, a chhungkhatte leh thian thate ngei pawhin an thauhthla, a tih dik loh leh sual avanga tuarah puhin, a chhiahhlawhte ngei pawhin engahmah an ngailo. Joba rilru nat dan tur leh hrehawm a tih tur zia hi kan hre phak lo mai thei. Thlamuantu leh puitu a mamawh ngawih ngawih laiin, diriam leh thinhrik a hlawh a, a beisei neih chhun ten an cheksawlh a ni.

Vawiinah hian Joba dinhmun anga hrehawm taka awm tawh kan awm em ka hre lo. Joba ang êm êm hi chu kan la awm lo a ni mai thei. Emaw, kan tuar dan a in ang kher lo a ni mai thei. Thil chiang tak chu, Joba tuar ang emaw, kawng dang pawhin harsatna nasa tak hi kan la tawk thei vek tih hi a ni. Chutiang hunah chuan kan dinhmun min hrethiam a, kan tuarna min tawmpuitu, kan harsatna min sutkian pui tur hi tute pawhin kan mamawh vek, beisei tur kan rilruin a zawnga Joba ang tho hian. Dawt a ni lo. 'Tumah ka mamawh lo' 'Tumah hi engatanmah ka ti lo' ti fo thinte pawh hian an thinlung chhungril berah chuan anmahni hrethiamtu an mamawh in an beisei ru tho tho. 

Mihring kan in ang lova, kan chunga thil thleng leh kan hun tawn dan a zira kan thil thlir dan leh kan dawn sawn dan a in ang vek lo. Mahse, tute pawh hian beisei chu kan nei vek. Kan chak leh that lai, kan vanglai chuan mahni tawkah ti thei ve tawk kan in ti a, tumah mamawh lo emaw kan inti fo. Lungkham leh vei ren run kan nei lova, ngaihtuah teh vak kan nei lo tlangpui. Beisei innghahna pawh kan nei lem lo. Mahse, harsatna leh buaina a lo thlen chiah hian innghahna tur kan zawng a, ngaihtuahna a buai a, rilru chhungril ber atangin suangtuahna kan nei a, beisei tur kan dap ruai thin. Chutih hunah chuan min hnem tu tur ni a kan hriat ten min hnem zo lova, kan hlimpui thin ten min ti lungngai a, kan chhuan em em ten min thlamuan zo lo. A tawpah chuan beidawnna thuk takah kan tlu lut thin. Mahse, chu chu a tawpna tur erawh a ni lo. Joba pawh a beidawn vawrtawpah a hrehawmna leh harsatna ata chhanchhuak tura beisei a nei, Tlantu chu. 

Joba ang hian kan nunah beidawn ngawih ngawihna kan tawk ve pawh a ni thei, kan rin leh beisei takte atangin kan beisei ang chhanna kan hmu lo a ni thei. Tumah min hnaih duh leh kan chunga that chhuah awm lo ni a kan hriat pawhin, kan dinhmun hrehawm ber, kan beidawn pui ngawih ngawih, thih hial kan chak phahna khawp harsatna tawk mah i la, Joban tlantu a beisei hi keini tan pawh a la rintlak reng e.

Joba chuan lungngaihna leh hrehawmna nasa tak a tuar laia hrethiamtu, tlantu, hahchawlhna a mamawh, chu chu khawvelah a hmu lo mahse, mihring lama a beiseina zawng zawng a bo hnuah beiseina nung a nei a chu chu Pathian a ni. Mihring lam atanga beiseina kan neih tawh miah loh hnu, innghahna leh dam chhan nei tawh lova kan inhriat hnuah pawh kan dinhmun min hrethiamtu beisei tur kan nei Pathian, min tlantu tur chu. Chu ka tlantu chu a nung a ni.